Cezar

Grumblu, sed ne nur

Grumblon oni devas havi,
sed ja ne por ĉiam pravi.
Grumblo estas granda forto.
Grumblu do pri via sorto.

Grumbli helpas ĉe l' defendo.
Ne subiĝu al pretendo.
Montru foje viajn dentojn
kaj ne timu viajn sentojn.

Grumblu, kara, ne grumbladu,
ne en grumbla sento vadu.
Se vi ĉiutage grumblas,
vi en ĉiu kazo stumblas.

Grumblo estas bona eco,
foje font' de vera deco.
Sed la grumblon mem ne celu,
enanime ĉiam belu.