(fotis Cezar en la Harcurbo

Thale ĉe la rivero Bode)

Cezar

La diablo

Li estas unu

el la kompatindaj figuroj,

kiuj jam delonge estas mortaj,

sed tamen plu devas vivi,

ĉar oni forgesis

entombigi ilin.

Jam en la fabeloj li estas tiu,

kiu ne gajnas la ludon.

Kun vosto kaj ĉevala piedo

li degeneris al celfiguro

en ŝercoj.

Ridinda figuro do.

Li estas tiel enuiga kiel Dio

kaj tiel maldanĝera

kiel la taverndrinkuloj,

kiuj pro frustracio

draŝas seĝojn kaj botelojn

reciproke sur kraniojn.

Kiel Mefisto

li ne plu estas akceptebla,

ĉar li havas tro da sprito.

Eĉ kiel inferohejtisto

li restas diletanto,

ĉar li akiris

tro da kulturo.

Obstine ekstermoda

estas sinjoro Volant,

kaj tial jam delonge

anstataŭita de multe pli

senskrupulaj mastroj

de l' hororo,

kiuj estas transprenintaj

la negocon de l' pensionulo.