Cezar

Ĉu morti tro frue?

Esti cindro nur en loko?
Ĉu ne ravas vin la voko:
"Estu vivo antaŭ morto,
forto, celoj, amosporto!"

Estu bruo kaj tamtamo
antaŭ fina mortodramo.
Hele brulu via torĉo,
via tre juneca sorĉo!

Ne al morto jam vin turnu.
Ne junule do enurnu.
Vin imagu juna dio,
jen ja eblas preskaŭ ĉio!

Solvu vin de viaj limoj
solvu vin de viaj timoj,
Vivu vivon eksplicitan,
longan vivon ekscititan.